الجلسرين معروف انه مرطب طبيعي للبشرة لانه بيحفظ الرطوبة في الجلد لكن هو ليه فوايد تانية كتير للبشرة, وفوايده مش بتقتصر على البشرة بس لكن كمان ليه فوايد كتير جدا للشعر, والنهاردة هنتعرف على فوايد واستخدامات الجلسرين للبشرة والشعر, ووصفات طبيعية لجمال شعرك وبشرتك من الجلسرين.زي ما بنستخدم الجلسرين لترطيب البشرة كمان ممكن نستخدمه لترطيب الشعر وفروة الراس وبالتالي بيساعد على نمو الشعر, كمان ليه خصائص مرطبة ومغذية جدا للشعر, وبيحميه من الضرر والتكسر وبيحافظ عليه صحي.
الجلسرين بيساعد على تطويل الشعر لانه بيحتفظ بالمية وبيمنع جفاف الشعر وبالتالي ده بيساعد على زيادة طول الشعر بشكل اكتر واسرع.
1- سبراي الجلسرين لكل انواع الشعر:
ممكن تستخدمي الجلسرين المخفف كسبراي لترطيب الشعر والحفاظ عليه ناعم وبيلمع, وممكن تستخدميه كسبراي بعد غسيل الشعر عشان تخلي الشعر رطب وتمنعي هيشانه.
– سبراي الجلسرين للشعر الجاف: اخلطي كميات متساوية من الجلسرين, زيت اللافندر, زيت خشب الصندل, زيت خشب الارز, وزيت خشب الورد, حطيهم في ازازة ببخاخ ورشي بيهم الشعر بعد الغسيل.
– سبراي الجلسرين للشعر العادي: اخلطي كميات متساوية من الجلسرين, زيت اكليل الجبل, زيت الافوكادو, زيت فول السوداني, زيت السمسم, زيت اللوز الحلو او المشمش, و زيت اللافندر.
– سبراي الجلسرين للشعر الدهني: اخلطي الجلسرين مع زيت البرتقان او الليمون, زيت شجرة الشاي,وزيت اللافندر.
– سبراي الجلسرين للحكة وقشرة الشعر: اخلطي الجلسرين مع زيت اكليل الجبل, زيت شجرة الشاي, زيت الليمون, زيت البابونج, وزيت اللافندر.
2- الجلسرين لشعر صحي:
اخلطي كميات متساوية من الجلسرين مع زيت الخروع وخل التفاح وبعدين حطي الخليط على فروة الراس ودلكيها لمدة دقايق وسيبي الخليط لحد ما ينشف واغسليه بنوع شامبو خفيف, كرري الوصفة مرتين في الاسبوع لشعر صحي وقوي وبيلمع.
3- الجلسرين لعلاج انقسام اطراف الشعر:
اخلطي كميات متساوية من الجلسرين وزيت الخروع وخل التفاح وضيفي عليهم بيضة طبقي الخليط على فروة الراس والشعر كله ودلكيه لمدة دقايق وبعدين غطي الشعر بفوطة او طاقية الشعر او كيس بلاستيك وسيبيه ساعة وبعدين اغسليه بمية دافية وشامبو, الوصفة دي مش بس بتمنع انقسام اطراف الشعر كمان بترطب الشعر وبتساعد على نموه.
4- الجلسرين لعلاج الحكة:
الجلسرين بيساعد على علاج حكة فروة الراس اللي ممكن يحصل بسبب جفافها بسبب الجو, دلكي فروة الراس بالجلسرين بشكل يومي منتظم ليه تأثير فعال جدا في التخلص من الحكة.
5- الجلسرين لعلاج قشرة الشعر:
تطبيق الجلسرين بشكل يومي على فروة الراس بيمنع وبيقضي على مشكلة قشرة الشعر وبيمنع جفاف, وبسبب الخصائص المهدئة في الجلسرين بيساعد على عمل تبريد لفروة الراس وبالتالي بيمنع حكة فروة الراس اللي ممكن تحصل بسبب القشرة.
6- علاج هيشان الشعر بالجلسرين:
هيشان الشعر بيحصل بسبب انخفاض الرطوبة في فروة الراس وده بيضر الشعر كله وبيخليه جاف وغير صحي, والجلسرين هيساعدك تتخلصي من مشكلة هيشان وخشونة الشعر وهيساعد على تنعيمه وترطيبة وبيغذي الشعر وبيساعد على زيادة نموه, طبقيه بشكل منتظم كل يوم على فروة الراس.
7- الحفاظ على الشعر الكيرلي بالجلسرين:
الشعر الكيرلي من الستايلات اللي فيه بنات كتير بيفضلوها, والجلسرين هيساعد انه يخلي الكيرلي احلى ويخليه صحي وقوي لانه زي ما قولنا بيحافظ على الرطوبة في فروة الراس وده بيضمن ان الشعر يفضل طري وبيلمع, وبيحافظ كمان على الزيوت الطبيعية اللي بتفرزها فروة الراس اللي بتساعد على ترطيب الشعر.
8- الجلسرين كمرطب للشعر:
الجلسرين يعتبر مرطب طبيعي للشعر, ممكن تخلطيه مع اي نوع زيت من الزيوت الاساسية, وطبقي الخليط على فروة الراس هيحسن نمو الشعر جدا ويرطبه ويغذيه, وبيحسن كمان طبقة فروة الراس.
9- الجلسرين لتنعيم الشعر.
اخلطي كميات متساوية من الجلسرين والمية وضيفي لهم كام نقطة من اي نوع زيت عطري امزجيهم كويس مع بعض, ورشي الخليط على الشعر بعد الغسيل الخليط ده بيخلي الشعر ناعم جدا ومفرود.
10- الجلسرين لتقوية ولمعان الشعر:
اخلطي معلقة كبيرة من زيت الخروع مع معلقة صغيرة جلسرين ومعلقة صغيرة خل تفاح وامزجيهم كويس مع بعض وطبقي الخليط على جذور الشعر ودلكية بلطف لمدة دقايق وبعدين سيبيه على الشعر 30 دقيقة واشطفيه بعدها بالمية وشامبو خفيفة كرري الوصفة مرة واحدة في الاسبوع.
11- الجلسرين لعلاج تكسر وانقسام اطراف الشعر:
اخلطي بيضة مع 2 معلقة كبيرة زيت خروع, ومعلقة صغيرة جلسرين, ومعلقة صغيرة خل تفاح, امزجي المكونات كلها كويس مع بعض وطبقي الخليط على جذور الشعر دلكيه لمدة دقايق وبعدين غطيه بفوطة دافية وسيبيه 40 دقيقة وبعدين اغسليه بالمية وشامبو خفيف, الخلطة دي بتساعد جدا على منع تكسر الشعر وانقسام الاطراف, وبتساعد على تقوية الشعر.
12- الجلسرين لتكثيف وتطويل الشعر:
اخلطي معلقة كبيرة جل صبار الالوفيرا مع 3 معالق كبيرة جلسرين, طبقي الخليط على فروة الراس والشعر كله وسيبيه 45 دقيقة وبعدين اغسليه بالمية والشامبو, كرري الوصفة مرتين في الاسبوع.
– فوايد واستخدامات الجلسرين للبشرة:
1- لتنعيم الجلد:
امزجي معلقة كبيرة من الجلسرين مع 10 معالق كبيرة مية, ادهني بشرتك بالخليط ده كل يوم قبل النوم واغسليه الصبح.
2- كتونر للبشرة:
اخلطي ¼ كوباية جلسرين مع ½ كوباية مية ورد, وحطي الخليط في ازازة ببخاخ ورشي بيه بشرتك, ولو البشرة دهنية اوي ممكن تضيفي للخليط 1/4 كوباية عصير ليمون.
3- لترطيب الجلد:
امزجي معلقة كبيرة من زيت فيتامين E مع معلقة كبيرة فازلين ومعلقة كبيرة جلسرين, وادهني بشرتك وجسمك بالخليط وسيبيه نص ساعة واغسليه.
4- لتبييض البشرة:
– اخلطي 200 مل من الجلسرين مع 2 معلقة كبيرة عصير ليمون ومن 1 – 2 كوب مية ورد, امزجي المكونات كويس واحتفظي بيها في ازازة واستخدميها على البشرة يوميا قبل النوم, الخليط بيساعد على تبييض البشرة وبيحميها من الظروف الجوية المختلفة طول السنة.
– وممكن تعملي كريم لعلاج تأثير اشعة الشمس على البشرة, اخلطي معلقة صغيرة شبة مطحونة مع 2 معلقة صغيرة جلسرين وكوباية مية ورد, امزجيهم كويس مع بعض واستخدميه بشكل يومي على البشرة.
5- لعلاج تشقق الكعبين:
اغسلي رجلك كويس وادهني الكعب والرجل كل يوم قبل النوم بالجسلرين والبسي شراب عشان يساعد على امتصاص الجلد للجلسرين.
6- لعلاج الجروح والحروق:
لو عندك علامات جروح او حروق ادهنيها يوميا بالجلسرين لحد ما تختفي العلامات.
7- لتطهير البشرة:
اخلطي ¼ كوباية جلسرين مع ½ كوباية مية ورد, وادهني بشرتك بقطنة مبللة بالخليط يوميا قبل النوم, ولو بشرتك دهنية ممكن تضيفي ¼ كوباية عصير ليمون للخليط.
8- للحفاظ على الجلد صحي:
ضيفي كمية من الجلسرين للكريم المرطب اللي بتستخدميه بشكل يومي وادهني بيه بشرتك بالطريقة العادية.
9- لعلاج التجاعيد:
اخلطي بياض بيضة مع معلقة صغيرة عسل نحل, طبقي الخليط على البشرة وسيبيه 20 دقيقة واغسليه بمية دافية.
10- لعلاج حب الشباب:
اخلطي معلقة كبيرة جلسرين مع معلقة كبيرة شبة مطحونة و1/2 معلقة كبيرة كافور, ضيفي المكونات لطبق فيه كوباية مية مقطرة, حطي الخليط على وشك وسيبيه لحد ما ينشف وبعدين اغسليه بمية دافية وبعدين بمية باردة عشان تقفلي المسام.
11- لازالة الرؤوس السودا:
اخلطي معلقة كبيرة من الطين المغربي مع 4 معالق كبيرة من اللوز المطحون و 4 معالق كبيرة جلسرين لحد ما يتكون عندك عجينة قوامها مناسب, طبقي العجينة على اماكن الرؤوس السودا او للبشرة كلها وسيبيها لحد ما تنشف وبعدين اغسليها بمية باردة.
12- تفتيح وترطيب الشفايف:
الجلسرين بيساعد على ترطيب الشفايف بشكل فعال وبيديها لون وردي طبيعي, ادهني شفايفك كل يوم قبل ما تنامي بالجلسرين هتلاقي بشرتك بقت فاتحة ووردية خلال فترة قصيرة, ومفيد جدا لتفتيح غمقان الشفايف اللي بيكون بسبب التدخين, وبيخلي الشفايف ناعمة ونضرة وصحية, حتى ممكن تستخدميه لعلاج تقرحات الفم ويعتبر افضل بديل للمراهم.
12-29-2018, 12:29 PM
عضويتي 
فوايد واستخدامات الجلسرين للعناية بالبشرة والشعر
العرض العادي
