خلفه البنات نعمه

النهارده عرفت يعني أي فعلا اللي مخلفش بنات يبقى مشبعش من الحنيه ولا داق الحلويات .. النهارده كنت مروح من الكليه الساعه 2 الضهر والناس مش طايقه نفسها والجو حر , وكنا راكبين الاتوبيس وزحمه وناس واقفه وكله زعيق وخناق .. فمن حظي الحلو اني وقفت قدام واحد هو وبنته الصغيره تقريبا 4 او 5 سنين , كنت حاسس انه في عالم تاني , بنته عماله تضحك معاه وتهزر وتوريه الساعه اللي مرسوم عليها كرتون مع انه تقريبا جاي من الشغل وشايل الشنطه على رجليه بالعافيه بس مابيقدرش يمسك نفسه من ضحكتها العسل وخفة دمها ,,, المهم جاله تليفون تقريبا حد من الشغل بيكلمه ولقيته بدأ يزهق ويتعصب ويزعق وفي عز ما هو بيتخانق في التليفون لقيت بنته بتبوسه من ايده وبتطبطب عليها ♥ فجأه لقيته هدي ووطي صوته وبيبص لبنته ويحسس على شعرها وقفل المكالمه .. انا فعلا مقدرتش غير اني اقوله قبل ما انزل , ياريت حضرتك ترقي بنتك عشان انا طول الطريق عمال اقرالها المعوذتين وبدعي ربنا يحميها لان ناس كتير كانت واخده بالها .. ------ كان عندي معاد انا ووالدتي مع دكتور الاسنان بالليل ,, وطبعا قعدت مستني دوري ,, ولاحظت حاجه غريبه اوي .. كل الناس الكبيره في السن اللي جاي معاهم هما بناتهم ,, حاولت ادور على راجل جايب ابوه للدكتور مالقتش ! لدرجة اني سألت والدتي ! هو ليه مفيش حد بيجي مع والده او والدته غير البنات مع انهم اكيد متجوزين ووراهم بيوت بردوا ! ---- بالمناسبه النهارده وانا رايح الكليه الصبح كان في طفل مع والدته رايح المدرسه والله العظيم طول الطريق امه مكنش على لسانها غير جمله واحده " بس بقى يا عادل كفايه القرف بتاعك دا صدعتني "

الاميره النائمه معجب بهذا