بسم الله الرحمن الرحيم
وبه نستعين
الفصل السادس
بعد العشاء استاذن محمد منهم بالذهاب للنوم لانه بيصحى بدري عشان بيقراء قرآن وكمان الجامع بعيد شوية من البيت زى خمسة دقائق ؟ دخل غرفته واخرج جواب صديقه جادين عاوز يعرف اخباره بعد السلام كانت المفاجاة السارة ان صديقه جادين يطلب يد اخته البعده حليمة وحكى ليهو بانه كان في مامورية مع تيم تطعيم الابقار بصفته الموظف المسؤول عن اعداد الابقار وصرف الدواء وشاءت الاقدار بان يكون منطقة التطعيم هي نفس منطقتهم وهناك التقيت بالوالد والوالدة واصر العم دليل بان يكون بيته هو المقر وكنت انا الابن المشرف على خدمة التيم واعجبت بالاخت حليمة وقلت اول حاجة اكلمك انت اها رايك شنو وضحك محمد وهو يقراء ؟ وقال في سره ان شاء الله خير وصمم بكرة يقعد مع امه وابوه ويشرح ليهم الموضوع
وعند الصباح قام آدم ومعه محمد بذبح الخروف الاول كرامة وصول دليل ومنصور ؟ وذهب محمد الي السوق لشراء مستلزمات الكرامة وايضاً وصل منزل صديقه واخبره بوصول والديه وعمه وزوجته وبعد قضاء اليوم وناس الكرامة راحوا ؟ جلس محمد مع امه وسالها عن اخوانه واخواته واهل الفريق الكبير والصغير وكيف الخريف كان معهم السنة الفاتت وابقارهم وامه تحكي له وتبكي وذلك لخوفها لسفر ولدها بلاد برا ويطمئنها محمد بانه ان شاء الله يرجع ليها دكتور ويعالج اهله بس رضاها عنه هو سبب نجاحه ؟ وقالت امه انا عافيه منك ظاهر وباطن عفواً يخضر ضرعك وينصرك علي عدوك انت ياولدي ماك ولد رضى امشي محل ما تقبل تلقاها خضراء ؟ وهذا الدعاء ماكان ينتظره محمد زاد لغربته وسلاح يحفظه من عثرات الزمن في المستقبل ؟ وقال محمد يمة فى كلام داير اقول ليك انتي وابوي ؟ وترد امه ان شاء الله خير ياولدي ؟ محمد لا خير يمة بس اكلم ابوي يجي واقول ليكم ؟ وامه في شوق لسماع الكلام نادت زوجها ؟ تعال يا دليل محمد قال عاوزك ؟ يرد محمد يمة انا براي بمشي بنادي ابوي يجي يقعد وجاء دليل ؟ خير يا محمد ؟ ويرد خير ياابوي اصلوا جادين ود عم عبد الله جاب لي جواب مع عمي منصور قال انه كان عندكم في موسم التطعيم وانه كان نازل هو وجماعتو معاكم في البيت والله بيشكر فيكم ؟ يرد والده ليه ياولدي انحنا عملنا شنو جادين ما زيك واحد هو ما جاء قعد معك اجازة المدرسة زمان وانتم صغار ؟ ويرد والله هو لم ينسى الكلام دا وهو ياابوي كتب لي وقال طالب يد اختي حليمة اها انتو رايكم شنو وبعدين كمان راى حليمة ست الموضوع بس الموافقة منكم في الاول ؟ يرد ابوه والله انا ياولدي بقول مبروك واهدي امك سمعت الكلام براها ؟ وتقول امه والله ياولدي جادين طيب ود ناس وانا ما عندى مانع ؟ ويقول محمد خلاص انا بكتب ليهو جواب بالموافقة منكم انتم الاثنين وبعدين عمي منصور لما ترجعوا بالسلامة كمان يسمع راى حليمة ويكلم جادين واهله وان شاء الله لو كان في العمر بقية نكمل